ဘယ်စာကိုဘယ်မှာ သင်မတုံး

ဘယ်စာကိုဘယ်မှာ သင်မတုံး

      ကျွန်တော်တို့ လူမှု ပတ်ဝန်းကျင်မှာ လူတိုင်းဟာ အလုပ်ကိုယ်စီ၊ တာဝန်ကိုယ်စီနဲ့ ကျင်လည် အသက်မွေးနေကြပါတယ်။ ဒီလိုအလုပ်တွေ မလုပ်ခင်မှာ လူတွေရဲ့ ၇၅% လောက်က အခြေခံပညာကိုသင်ယူတက်မြောက်ပြီးကြပါပြီ။ အဲဒီအထဲကမှာ ဘာကို ကျွန်တော်သွားတွေ့လဲ ဆိုတော့ အလုပ်နဲ့ ကျောင်းနဲ့ ၀ါသနာနဲ့ ထပ်တူမကျတာတွေ သွားတွေ့ပါတယ်။အားလုံးက အခြေခံပညာကျောင်းတုန်းက အတူတူသင်ကြလေ့လာကြရပါတယ်။ နောက်ပိုင်းမှ မိမိအတွက် အသက်မွေးဝမ်းကျောင်း ပြုနိုင်မဲ့ ပညာဘက်ကို ဆက်လိုက်ကြ လေ့လာကြရပါတယ်။

          တချို့က ရိုးရိုးတက္ကသိုလ်၊ တချို့က စက်မှုတက္ကသိုလ်၊ တစ်ချို့က ဆေးကျောင်း၊ တစ်ချို့ စစ်တပ်ထဲဝင်၊ တချို့ ပညာရေး ကောလိပ်တက်၊တက္ကသိုလ်တက်ကြနဲ့ ဆက်ပြီး လေ့လာသင်ယူကြရပါတယ်။

          တလောက သူငယ်ချင်းတစ်ယောက် သူဝါသနာပါတာက ရေကြောင်းပညာ၊ အမှတ်လဲမှီပါတယ်…..အဲဒါကိုမိဘတွေ တက်စေချင်တာက ဆေးကျောင်း၊ ဒါကြောင့်သူမတက်ချင်တဲ့ဆေးကျောင်းကို တက်နေရပါတယ်။ အစကတည်းက သူဆေးပညာကိုစိတ်မ၀င်စားတော့ ကျောင်းချိန်မှာ အတန်းလစ်တယ်၊ဂိမ်းဆော့တယ်။တစ်ခါတစ်လေ အရက်ဆိုင်ရောက်နေတက်ပါတယ်။ကျွန်တော်သူ့ကို အားပေးစကားပြောပြီးမနည်း နှစ်သိမ့်ခဲ့ရပါတယ်။

          အဲဒီနောက်ပိုင်းမှာဝါသနာနဲ့ ကိုယ်သင်ယူနေတဲ့ပညာ အကြောင်း အားရင်အားသလို အတွေးနယ်ချဲ့မိပါတော့တယ်။ ဒါတွေဟာ တနည်းအားဖြင့် Brain Drain တွေပင်ဖြစ်ပါတယ်။အဲဒီအသုံးအနှုံးကို လူသိများပါတယ် “ဦးနှောက် ယိုစီးမှု” ၊ အထူးသဖြင့် ကိုယ့်နိုင်ငံကပညာတက်များ လူသားအရင်းအမြစ် သယံဇာတ များ တိုင်းတစ်ပါးသို့…ယိုစီးရောက်ရှိသွားခြင်းကိုဆိုလာပါတယ်။

          ကိုယ်မသင်ယူချင်သော စိတ်မ၀င်စားသော ဘာသာရပ်ကို အကြောင်းအမျိုးမျိုးဖြင့် သင်၊ ထိုဘာသာရပ်ကို အထင်မကြီး၊ မချစ်၊ ထိုဘာသာရပ်ကို အသုံးမချ၊ ဖွံ့ဖြိုးအောင် မကြိုးစား စသည့် အချက်အလက်များသည်လဲ Brain Drain ပင်ဖြစ်ပါသည်။

          ဟိုနားသည်နားက LCCI ဆိုသော အသံဗလံ ကလေးများ ထွက်လာတော့ အဲဒါ LCCI ရှိရာ ဆီသို့ ပြေးသွားလိုက်၊ MBA လှိုင်းတွေ ရိုက်ခတ်လာသောအခါ MBA ဘက်ရောက်သွားလိုက် ၊သူများ TOEFL ဆိုတော့ ကိုယ် TOEFL ၊သူများ IELTS ဆိုကိုယ် IELTS။

          တကယ်တော့ နိမ့်မြင့်လို့၊ ဟိုလူ့ကြောင့်သည်လူ့ကြောင့် ပညာရှာဖွေ နေသည်မျိုးမဟုတ်ဘဲ ကိုယ်လျောက်လှမ်းမည့် ဘ၀ လမ်းကြောင်း နှင့် စပ်ဟပ်ကာ စိတ်ကြိုက် ပညာရပ်ကို သင်ယူခြင်းသာ ထွန်းကားရာ အလုပ်ဟု ကျွန်တော်ယူဆပါသည်။

          ကျွန်တော်တို့အားလုံးဟာ အစဉ်လေ့လာသင်ယူ နေသူတွေဖြစ်လို့ ဒီပို့စ်လေးကို စာရေးဆရာ မောင်သာချို ရေးတဲ့ “အနာဂတ် ၀ါကျများ” ဆိုတဲ့စာအုပ်ထဲက ဆောင်းပါးကို ကျွန်တော့်အိုင်ဒီယာနဲ့ ပေါင်းပြီး စာဖတ်သူတွေအတွက် မျှဝေပေးလိုက်ပါတယ်။ ဒီစာကိုဖတ်ပြီး ကိုယ့်ကိုကိုယ် ပြန်မေးကြည့်ကြရအောင်…………………..

“ဘယ်စာကိုဘယ်မှာ သင်မတုံး?” လို့……………..။

အားလုံးကိုလေးစားလျက်

ပစ်တိုင်းထောင်(Wisdom Life)

         

Posted in: